সন্ন্যাস খণ্ড
রাজা বলে শুনেক খেতু খেতুআ প্রানের ভাই।
কিবা কর ভাই খেতুআ নিছন্তে বসিয়া।
পাচ খানি কলার নোকা জোগাও তো আনিয়া॥
কেসালিক ডাঙ্গাত্র নিগি মারোআ গাড়িয়া।
ধুপ ধুনা ঘৃত কলা জোগাইলে নিগিয়া॥৫
রাজার জত দেওয়ান পাত্র নাজির উজির আসিল সাজিয়া॥
সাদু গুরু বৈষ্টম কত আসিল সাজিয়া।
এই শব্দ শুনলে মএনা ফেরুসাএ থাকিয়া॥[১]
ফেরুসা হইতে বুড়ি মএনা আসিল চলিয়া।
হুঙ্কারেতে দেবগনক আ’নলে ডাক দিয়া।১০
রাজার মস্তক খেউরি করে মারোআএ বসিয়া॥
- ↑ পাঠান্তর:—
মা মা বলি রাজা ডাকিতে নাগিল।
ডাক মধ্যে মএনামতি দরশন দিল॥
আসিয়া নএনামতি নাপিতক দেখিল।
নাপিত দেখি মএনা ভয়ঙ্কর হৈল॥
নাপিতের তরে কথা বলিতে নাগিল॥
মএনা বলে নাপিত কার প্রানে চাও।
কামাইও ছাইলার মাতা না করিও ঘিন।
সোনা দি বান্দাম খুর তোর মানিক দিম চিন॥
গামারি পিড়া রাজাক বসিবার দিল।
এক ঝাড়ি জল আনিয়া জোগাইল॥
রাজার মস্তকের পাগুড়ি খেতুআর মাতাএ দিল॥
জখন রাজার মাতাএ তুলি দিলে জল।
রাজ্য পাট সিঙ্গাসন করে টলমল॥
