ছেইলাক কোলে নিয়া মএনা লৈক্খ চুম্ব খাইল॥
বাবা ভাল গেয়ান শিখা আইলু বিদেশ সহরে।২৩০৫
সুখে এলা রাজ্য কর পাটের উপরে॥
ধরিয়া বান্ধিয়া তোর গলাএ দ্যাওঁ মালা।
জমগুলা করি দিম তোক এলা চরনের ঘোড়া॥
ধবল বস্ত্র নিলে মএনা পরিধান করিয়া।
হেমতালের নাটি নিলে হস্তে করিয়া॥২৩১০
রানির মহলক নাগি গ্যালত চলিয়া।
খেতুআর তরে কথা মএনা দ্যাএছে বলিয়া॥
খেতুরে, সহরে সহরে আইসেক এ ঢোল পিটিয়া।
রাজার জত দেওয়ান পাত্র আসুক সাজিয়া॥
মএনার বাক্য খেতু ব্রথা না করিল।২৩১৫
সহর জাএয়া খেতুআ এ ঢোল পিটা’লো॥
রাজার জত দেওয়ান পাত্র আসিল সাজিয়া।
জত রাজার আইয়ত প্রজা সাজিয়া আইল।
সাদু গুরু বৈস্টম কত আসিয়া খাড়া হৈল।
কৈল্লাস নাগিয়া মএনা হুঙ্কার ছাড়িল॥২৩২০
মএনার গুরু শিব গোরেকনাথ আসিয়া হাজির হৈল।
ত্রিসাল কোটি দ্যাবগন সাজিয়া আসিল॥
নাপিতক আনিয়া মএনা রাজার মস্তক মুড়াইল।
পঞ্চজন ব্রাম্মন আনিয়া বেদবিধি পড়াইল॥[১]
- ↑ গ্রীয়ার্সন্ সাহেবের সংগৃহীত পাঠে—
মধু নাপিতক আনিল ডাকিয়া।
সাত গোলা ধান খয়রাত করিল॥
রাজা কিরা সুদ করিবার লাগিল।
বামনে আসিয়া নৈবদ ভানা দিল॥
সংকীর্ত্তন রাজা করিবার লাগিল।
