ওঠে মএনা বুড়ি দিশাহারা হৈল॥৪২৫
ধিয়ানতে বুড়ি মএনা ধিয়ান করিল।
ধিয়ানতে বুড়ি মএনা ইচিলার লাগ্য পাইল॥
মুনিমন্ত্র গিয়ান নিলে রিদএ জপিয়া।
লৈক্ক গোণ্ডা মইস হৈল কায়া বদলিয়া॥
এগ্ এগ্ করি খার জাবুরাক জাএছে গিলিয়া।৪৩০
এই বার বেটা গোদাক ফ্যালানু গিলিয়া॥
আবার বাম গাল্সি দিয়া গোদা পড়িল হস্কিয়া॥
বাম গাল্সি দিয়া গোদা হস্কিয়া পড়িল।
তুড়ু তুড়ু করিয়া ময়না হুঙ্কার ছাড়িল।
যত মনিগনক হুঙ্কারে নামাইল॥
পুষ্পরথে গোরক বিদ্যাধর।
ঢেকি বাহনে নামিল নারদ মুনিবর॥
বাসারার পিটিত নামিল ভোলা মহেশ্বর।
ধনুক বানে নামি গেল স্রীরাম লক্ষন॥
পাঁচ ভাই পাণ্ডব নামিল ঠাঁই ঠাঁই।
যত সত মুনি নামিল তার লেখা যোখা নাই॥
মাথার চুল ময়না দুই আধ করিয়া।
গোরকনাথের চরনত পড়িল ভজিয়া॥
রক্ষা কর রক্ষা কর গোরক বিদ্যাধর।
আমার স্যামি ধন আনিছে ধরিয়া॥
আমার স্যামি ধনক না দেয় ছাড়িয়া।
গোরকনাথ বলে সোন সোমাচার॥
যত মুনিগন পরামর্স করিয়া।
ময়নাক আসীর্ব্বাদ দেয়॥
যা যা ময়না তোমাক দিলাম বর।
সাত মাসি ছেলে হৌক উদরের ভিতর॥
যেন মতে মুনিগন আসীর্ব্বাদ দিল।
সোলার মত আছিল শরীর ক্রমে ভারি হইয়া গেল॥