এতেন স্বাধিষ্ঠানং দ্রঢ়য়তি। পুনঃ স্বয়মেব আগত্যাধোনাসায়াং বজ্রমণিশিখরশুসিরে বোধিচিত্তং বিন্দুমবিদ্যাবীজদ্বেষ(ষা)কল্করহিতেন প্রভাস্বরেণ গুরূপদেশাদভিসন্ধ্য বারুণীতি সুখপ্রমোদত্বাৎ বোধিচিত্তং বন্ধয়তি।
ধ্রুবপদেন পরমার্থবোধিচিত্তং দৃঢ়ীকুর্ব্বন্নাহ—
সহজেতি। বজ্রগুরুপ্রসাদাৎ বিরমানন্দেন সহজানন্দং স্থিরীকৃত্য ভো বালযোগিন্। বারুণীতি সন্ধ্যাবচনেন তদে[৭]ব সংবৃত্তিবোধিচিত্তং বোদ্ধব্যং। তস্য বোধিচিত্তস্য স্বাধিষ্ঠানগতস্যাক্ষরতাসুখপাশেন বন্ধনং কৃত্বা যেনাভ্যাসবিশেষেণাঽজরামরত্বং দৃঢ়স্কন্ধং লভসে তৎ কুরু।
তথাচ যোগরত্নমালায়াং[১]—
দৃঢ়ং সারমশৌষীর্য্যমচ্ছেদ্যাভেদ্যলক্ষণং।
অদাহী অবিনাশী চ শূন্যতা বজ্র উচ্যতে॥
পদান্তরেণাস্য প্রতিনির্দ্দেশমাহুঃ—
দশমীত্যাদি। বৈরোচনদ্বারেঽপি মহারাগসুখপ্রমোদচিহ্নং দৃষ্ট্বা গন্ধর্ব্বসত্ত্বো হি স্বয়মেবাগতা তেন দ্বারেণ প্রবিশ্য মহাসুখকমলরসপানেন সূচিতপ্রীণনং করোতি।
তথাচ কৃষ্ণাচার্য্যপাদাঃ—
এবংকার বীঅলই কুসুমিঅ অরবিন্দ
হো মহুঅররূপং সুরঅবীর জিংঘই মঅরন্দ।
ভণই কাহ্নু মণ কহবি ণ ফিটই
ণিচল পবণ ঘরণি ঘরে বট্টই॥
চতুর্থোপদেশমাহ—
এক ঘ ডুলীত্যাদি। সৈব[২] পূর্ব্বোক্তাবধূতিকা সংবৃত্তিপরমার্থসত্যদ্বয়ং ঘটতীতি কৃত্বা ঘটী[৩] আভাসদ্বয়নিরোধাৎ[৭ক]সূক্ষ্মরূপা। বিরুআপাদাঃ এবং বদন্তি। তয়া শুক্রনাড়িকয়া[৪] গুরোরুপদেশাৎ তমপতিতং বোধিচিত্তং স্থৈর্য্যং কৃত্বা নিস্তরঙ্গরূপেণ চালয়।
তথা সেকোদ্দেশে—
যাবন্নো প[ত]তি প্রভাস্বরময়ঃ শীতাংশুধারাদ্রবো
দেবীপদ্মদলোদরে সমরসীভূতো জিনানাং গণৈঃ।
স্ফূর্জ্জদ্বজ্রশিখাগ্রতঃ করুণয়া ভিন্নং জগৎকারণং
গর্জ্জদ্ধীকরুণাবলস্য[৫] সহজং জানীহি রূপং বিভোঃ। ৩ ।
