বৌদ্ধযুগ—মাণিকচন্দ্র রাজার গান—খ্রঃ ১১শ-১২শ শতাব্দী। סא9א এক বিলাইর বদলী বিয়াল্লিশ বিলাই হুইয়া। কঠিয়া তেলির ঘর লইল ঘেরিয়া॥ এক দণ্ড দুই দণ্ড তিন দণ্ড হইল। স্ববোধিয়া গোদা-যমক কুবোধিয়া লাগাল পাইল। মাচা হইতে গোদা-যমক মৃত্তিকায় নামাইল। টরকিয়া (১) যায় ময়নামতী গৱদানাত (২) ধরিল। ঐত গোদা-যম আটিয়া বজ্জর। আঙ্গুলের সান্ধি দিয়া উঠিয়া দিল লহুড়। ওরূপ থুইল যম একতর করিয়া। বৈষ্ণব রূপ হইল যম মুরত বদলাইয়া॥ কাকড়ার মাটিয়া লইল চন্দন করিয়া। সাইলের (৩) ফল লইয়া মালা করিয়া ৷ এণ্ডার (৪) ঠাল (৫) লইয়া আসা (৬) করিয়া॥ সেবার বাড়ীক (৭) লাগিয়ে গেল চলিয়া। যত বৈষ্ণবের মধ্যত রইল বসিয়া॥ ধেয়ানে ময়নামতী ধেয়ান কৈরে চায়। ধেয়ানের মধ্যে বৈষ্ণবের লাগাল পায়॥ ওরূপ ধুইল ময়না একতর করিয়া। মৌমাছি হইল ময়না মূর্ত বদলাইয়া॥ এক মাছির বদলী বিয়াল্লিশ মাছি হয়। সেবার বাড়ীক লাগিয়ে গেল চলিয়া॥ যত বৈষ্ণবের মাথার উপর বেড়ায় ঘুরিয়া। বৈষ্ণব সকল বোলে ভাই শুন সমাচার। কোন বৈষ্ণব অপরাধী আছেন সভার মাঝ॥ যেন মতে গোদা-যম মাছি দেখিল। উড়াও দিয়া যমের ঘাড়ত পড়িল ৷ মাছির কামড় সইবার না পারিয়া। গোদা-যম পালাইল ছাড়িয়া॥ (১) লম্ফ দিয়া। (২) গ্রীবাতে। (৩) অপরাজিতার। (৪) এড়গু বৃক্ষের। (৫) ডাল। (৬) আসা = ষষ্টি। (৭) আশ্রম।
