শনিবারে হৈল রাজার শন্যে মহাস্থিতি।
রবিবার দিন হৈল ভাঙের অধোগতি॥
সোমবারত দিনে রাজার মুড়িয়া গ্যাল মাথা।
মঙ্গলবার দিনে রাজার সিয়াইল ঝুলি ক্যাঁথা॥৭০
বুধবারে গোরেকনাথ হরিনাম মন্ত্র দিল।
বিশ্শইদবার দিনে রাজাক ডোর কপিন পরাইল॥
শুক্কুরবারে দুই পর সমএ সন্ন্যাস সাজাইল।
রাম অবতারে ধনুকধারি কৃষ্ণ অবতারে বাশি।
নিতাই অবতারে ডণ্ডধারি রাজা হইল সন্ন্যাসি॥
আপনার ঝুলি মান্ত্রা রাজাক দান দিল।
আপনার হরির নামের মালা রাজাক দান দিল॥
করঙ্গ তুর্ম্মা রাজার হস্তে দিল॥
এক তাকর বস্ত্র নিলে কপিন ফাড়িয়া।
চা’র আঙ্গুল বস্ত্র দিলে এ ডোর করিয়া॥
তিন হাত বস্ত্রে দিলে খিড়কা বানেয়া॥
তুরু তুরু করিয়া ময়না হুঙ্কার ছাড়িল।
সোল সত মুনি হুঙ্কারত নামিল॥
পুষ্পরথে নামিল গোরক বিদ্যাধর।
ঢেকি বাহনে নামিল নারদ মুনিবর॥
বাসোয়ার পিঠিত নামিয়া গেল ভোলা মহেস্বর।
ধনুকবানে নামিয়া গেল স্রীরামলক্ষন॥
পাঁচ ভাই পাণ্ডব নামিল ঠাঁই ঠাঁই।
কান কাটা হাড়ি সিদ্ধা লেখা যোখা নাই॥
ঘসির ধুলা দিয়া বদন ঢাকিল।
সম্রাট দেখিয়া মএনা কান্দিবার লাগিল॥
