সাত বছরকার বয়স হৈল পাটত বসিয়া।
এখন পাত্রি দ্যাখে বুড়ি মএনা ধিয়ানত বসিয়॥
ধিয়ানত বসি মএনা পাত্রি দেখিল।
হরিচন্দ্র রাজার কন্যা রদুনাক পদুনাক সতি দেখিল॥
নারদক নাগিয়া বুড়ি মএনা হুঙ্কার ছাড়িল।৬৮০
ডাক মধ্যে নারদ মুনি আসিয়া হাজির হৈল॥
কিবা কর নারদ মুনি নিছন্তে বসিয়া।
হরিচন্দর রাজার মহলক নাগি জাক চলিয়া॥
মএনার বাক্য নারদ মুনি ব্রথা না করিল।
হরিচন্দ্র রাজার মহলক নাগি গমন করিল॥৬৮৫
পাত্রি দেখিয়া আসি নারদ মুনি মএনাক বলিতে নাগিল॥
ভাল পাত্রি মএনা মাই আসিলাম দেখিয়া।
তোমার ছাইলাক বিবাও দ্যান পুষ্প সেঞেরা দিয়া॥
জখন বুড়ি মএনা একথা শুনিল।
একথা শুনিয়া মএনা বড় খুসি হৈল॥৬৯০
এক মঙ্গলবারে শুবাশুব বুঝিল।
ফের মঙ্গলবার দিনা দরগুআ করিল॥
ফের মঙ্গলবার দিনা বিবাহ সাজাইল॥
রদুনাক বিবাও কৈল্লে পহুনাক পাইল দানে।
এক শত বান্দি পাইল ব্যাবারের কারনে॥[১]৬৯৫
- ↑ ডাঃ গ্রীয়ার্সন ধৃত পাঠ—
আজি কালী করিয়া নও বৎসর হইল।
ঐ কন্যা যুড়িয়া আইস বলিলাম তোমায়॥
তখনি ময়নানতি কোন কাম করিল॥
গুরু ব্রাহ্মনের সাইক্ষাত কথা বলিবার লাগিল॥
যা যা গুরু ব্রাহ্মন বাক্য আমার লও।
হরিচন্দ্র রাজার কাছে সীঘ্র করিয়া যাও॥
তার ঘরে আছে অদুনা পদুনা কন্যা দুইজন।
তার আছে কন্যা দুই জন মহলের ভিতর।
