সকল লোকে বলে মহারাজ পরিক্খা হইল জয়।
রদুনা নারি কয় এ পরিক্খা নয়॥
রাজা কএছে শুন রানি জবাবে বুঝাই।৮২০
কোড়াকের বুদ্ধি নাই শরিলের ভিতর।
শির মুড়িয়া ধন্মিরাজা ছাড়িম বাড়ি ঘর॥
তোমার টাকা চাইতে রানি মোর টাকা বিস্তর॥
তোমার বিবার টাকা দিব তোমার বাবারে গনিয়া।
তবু তোমার হাত ধরি ব্যাড়াব টারিতে হাটিয়া॥
জখন কানা মুনি একথা বলিল।
ক্রোদ্ধ হএয়া রদুনা রানি ক্রোদ্ধে জলি গেল॥
তেমনি রদুনা রানি এই নাওঁ পাড়াব।
কানাকে চক্খুদান দিয়া পরিক্খায় চলি জাব॥
দুই বান্দি ধৈল্ল কানাক চিত্র করিয়া।
এক মুট বালু দিলে দুই চক্খে ঢালিয়া॥
গাভির খুট দিয়া কানার চক্ষু ফ্যালাইল উল্টিয়া॥
কানার চক্খু রদুনা রানি উলটিয়া ফেলিল।
চক্খু দান পাওয়া কানা সয়াল সংসার দেখিল॥
ভাল মাও চলিয়া গ্যাল মারঅলি দিয়া।
চক্খু দান দিল দুই গুতায় আসিয়া॥
রদুনা রানি জখন কানাকে চক্খু দান দিল।
রাস্তাএ থাকিয়া ডাকিনি মএনা তা নয়নে দেখিল॥
নয়নে দেখিয়া মএনা বড় খুশি হৈল।
রদুনা পদুনা রানি পন্ত মেলা দিল॥
কতেক পন্ত জাএয়া রানি কতেক পন্ত পাইল
ফোক্লা মুনির গ্রামে জাএয়া রুপস্থিত হৈল॥
রানিকে দেখিয়া ফোক্লা কটুবাক্য বলিল॥
এই সব রানিক জদ্যপি আমি ফোকলা পাই।
সুন্দর হাতে গুআ পান পিসি দেউক ফুটানি করিয়া খাই॥
একথা শুনিয়া রদুনা রানি ক্রোধমন হৈল।
দুই গালে দুই ডিয়া কসিয়া মারিল॥
