এক এক করি খালের এন্দুর জাএছে গিলিয়া॥
মুঞি জ্যাখন এন্দুর বেটাক ফ্যালানু গিলিয়া।
বাম গাল্সি দিয়া বেটা পড়িল হস্কিয়া॥৪১০
এক দণ্ড দুই দণ্ড তিন দণ্ড হইল।
সুবোধিয়া গোদা যমক কুবোধিয়া নাগাল পাইল॥
মাচা হইতে গোদা যমক মৃত্তিকায় নামাইল।
টরকিয়া যায়া ময়নামতী গরদানত ধরিল॥
ঐত গোদা যম আঁটিয়া বজ্জর।
আঙ্গলের সান্দি দিয়া উঠিয়া দিল লহড়॥
ও রূপ থুইল যম একতর করিয়া।
বৈষ্ণব রূপ হইল যম মুরত বদলাইয়া॥
কাকড়ার মাটিয়া লইল চন্দন করিয়া।
সাইলের ফল লইল মালা করিয়া॥
এণ্ডার ঠাল লইল আসা করিয়া।
সেবার বাড়ীক নাগিয়া গেল চলিয়া॥
যত বৈষ্ণবের মধ্যত রইল বসিয়া॥
ধেয়ানে ময়নামতী ধেয়ান কৈরে চায়।
ধেয়ানের মধ্যে বৈষ্ণবের লাগান পায়॥
ও রূপ থুইল ময়না একতর করিয়া।
মৌমাছি হইল ময়না মুরত বদলাইয়া॥
এক মাছির বদলী বিয়াল্লিস মাছি হয়।
সেবার বাড়ীক নাগিয়া গেল চলিয়া॥
যত বৈষ্ণবের মাথার উপর বেড়ার ঘুরিয়া॥
বৈষ্ণব সঞ্চল বলে ভাই সোন সমাচার।
কোন বৈষ্ণব অপরাধী আছেন সভার মাঝ।
যেনমতে গোদা যম নাছি দেখিল।
বৈষ্ণবের কেঁথার তলত্ সন্দাইল॥
যেনমতে ময়নামতি সন্দান দেখিল।
উড়াও দিয়া যমের ঘাড়ত পড়িল॥
