চৌকিয়া পিড়া দিলে বসিবার নাগিয়া।
সুবন্ন ভিঙ্গারে গঙ্গাজল দিল আগা করিয়া।[১]
ছাইলাক ডাকায় বুড়ি মএনা কান্দিয়া কাটিয়া॥১২৫
আইস আইস জাদুধন দুখুনির দুলালিয়া।[২]
রন্ন খাএয়া জাও জাদু বৈদেশ নাগিয়া॥
জখন ধম্মিরাজ রন্নের নাম শুনিল।
পঞ্চ নোটা গঙ্গার জলে ছিনান করিল॥
ছিনান করি রাজা রাহ্নিক করিল।১৩০
রাহ্নিক করিয়া রাজা রন্নের কাছে গ্যাল॥
সুবন্নের থালে রন্ন দেখি কান্দিতে নাগিল॥[৩]
জখনে আছিলাম মা রাজ্যের ঈশ্বর।
সুবন্নের থালে রন্ন মা খাইয়াছি বিস্তর॥
এখন হইলাম কপিনপিন্দা কোড়াকের ভিকারি।১৩৫
সুবন্নের থালে রন্ন খাইতে না পারি॥
সুবন্নের থালের অন্ন কদুর থালে নিয়া।
সুবন্ন ভিঙ্গারের গঙ্গাজল করঙ্গ তুম্মায় নিয়া॥
রন্ন খায় ধম্মিরাজ পত্রে বসিয়া॥[৪]
- ↑ পাঠান্তর—
সোনালিয়া ঝাড়িত জল নইলে ভরিয়া।
ঐ জল দিলে আগা করিয়া॥ - ↑ গ্রীয়ার্সন সাহেবের সংগৃহীত পাঠে পাই:—
অন্ন খাও অন্ন খাও রাজ দুলালীয়া।
- ↑ গ্রীয়ার্সন সাহেবের সংগৃহীত পাঠ:—
যেন মতে থালত অন্ন দেখিল।
কপালত মারিয়া চড় কান্দিবার লাগিল॥ - ↑ গ্রীয়ার্সন সাহেবের সংগৃহীত পাঠে পাই:—একখান কলার পাত আনিলে কাটিয়া।
তাহাত অন্ন গুটিক লইল ঢালিয়া॥